नयाँ कुरो

संघीय मामिला तथा स्थानिय विकास मन्त्री लालबाबु पण्डित, मुख्य सचिव लोकदर्शन रेग्मी, अख्तियारका पूर्व प्रमुख सूर्यनाथ उपाध्यायसहित सरकारका उच्च पदस्थ कर्मचारीले शनिबार चलचित्र ‘सयकडा दश’ हेरेका छन् ।

काठमाण्डौको कुमारी हलमा यो चलचित्र हेर्न पुगेका मन्त्री पण्डितले विषयवस्तु, प्रस्तुति, सन्देश र मौलिकताको आधारमा राष्ट्रिय चलचित्र तय गरिनुपर्ने बताए । भ्रष्टाचारको कथालाई उठान गरेको कारणले पनि यो चलचित्रलाई ‘राष्ट्रिय चलचित्र’ तोकिनु आवश्यक रहेको उनले सुनाए । आफू चलचित्र हेर्दा पटक–पटक रोएको भन्दै मन्त्री पण्डितले चलचित्र हेर्न यूवाहरुलाई आग्रह गरे ।

उनले कलाकार राजाराम पौडेलको अभिनयको खुलेर प्रशंसा गरे । अख्तियार पूर्वप्रमुख उपाध्यायले भ्रष्टाचार नियन्त्रण प्रयासका लागि चलचित्र सशक्त माध्यम भएको बताए । शुक्रबार रिलिज भएको यो चलचित्रलाई रामशरण पाठकले निर्देशन गरेका हुन् । चलचित्रमा मनोज गजुरेल, राजाराम पौडेल, अमृत ढुंगाना, करुणा श्रेष्ठ लगायतको अभिनय छ ।