युद्धबहादुर बोहोरा : दक्षिण कोरियामा कार्यरत फाल्गुनन्द गाउँपालिकाकाका युवाहरूले आफ्नो पालिकालाई आइतबार स्वास्थ्य सामाग्री उपलब्ध गराएका छन् ।
वैदेशिक रोजगारको सिलसिलामा दक्षिण कोरिया पुगेका युवाहरूले कोभिड महामारीबाट पालिकाका धेरै नागरिकलाई स्वास्थ्य संकट परेको बेला स्थानीय सरकारलाई थप मद्दत पुर्याउने उद्धेश्यले सामाग्री उपलब्ध गराइएको हस्तान्तरण कार्यक्रमका संयोजक हाङ चेम्जोङले जानकारी दिनुभयो ।
पालिकालाई प्रदान गरिएका सामाग्रीहरुमा दुई लाख ८४ हजार आठ सय ९८ रुपैया बराबरको पीपीइ २४ सेट, अक्सिमिटर १२ थान, थर्मलगन १२ थान ,सेनिटाईजर ५ लिटरको २० थान र आधा लिटरका ६० थान ,मास्क २५ हजार थान, गम्बुट १२ जोर, पञ्जा २० प्याकेट रहेको छ ।
यसैबीच, समुहले स्वास्थ्य कर्मीहरुसंग परामर्श गरि कोभिडका विरामीलाई आवश्यक पर्ने औषधि सिटामोल सात हजार ट्याब्लेट, चेवनप्राश (आयुर्वेदिक औषधि) एक किलोग्रामका एक सय बट्टा, कस्तुरी भुषण ७५ थान, यस्टी मधुचूर्ण ५० थान र लक्ष्मी विलास रस दुई हजार ट्याब्लेट, कफसिरप दुई सय थान, भिटामिन सि ४० बट्टा लगायतका सामाग्री उपलब्ध गराएको पालिकाका प्रमुख प्रशासकीय अधिकृत निर्मल तुम्रोकले जानकारी दिनुभयो ।
विपत्तिमा आफ्नो जन्मथलो सम्झिएकोमा गाउँपालिका उपाध्यक्ष देवीत्रा कुमारी आङदेम्बेले युवाकाे कार्यको प्रशंसा गर्नुभएको थियो ।
स्वास्थ्य सामाग्री ग्रहण गर्दै गाउँपालिका अध्यक्ष वीरबहादुर कुरुम्बाङ तथा उपाध्यक्ष देवित्रा कुमारी आङदेम्बेले विपद्को समयमा स्वास्थ्य सामाग्री उपलब्ध गराएकोमा धन्यवाद दिनुभएको छ ।
हस्तान्तरण कार्यक्रममा दक्षिण कोरिया समुहका ठाकुर नेम्वाङ र राइफल नेम्वाङको पनि उपस्थिति रहेको थियोे ।
यस समुहले आर्थिक विपन्न परिवारका विरामीलाई उपचार खर्च सहयोग गर्दै बताइएको छ ।
