देशभर मनसुनी ९दक्षिण पश्चिमी दिशाबाट बहेको अरेबियन सागरबाट प्रवाहित शाखाको वायुको प्रभाव रहनुकासाथै मनसुनी न्युन चापीय रेखा पनि नेपाल नजिक रहेको जल तथा मौसम पूर्वानुमान महाशाखाले जनाएको छ ।

हाल देशभरको मौसममा सामान्य देखि पुर्ण बदली रहेको छ भने केही स्थानहरुमा वर्षा भईरहेको छ। पछिल्लो ३ घण्टा सुदरपश्चिम प्रदेश र प्रदेश ५ का अधिकांश स्थानमा हल्कादेखि मध्यम बर्षा भएको छ ।

जसका कारण मोहना, मछेली, कान्द्रा लगायत कैलाली, कञ्चनपुर, सुर्खेत र डोटी भई बहने साना खोलामा बहाव बढ्ने सम्भावना रहेकाले सतर्कता अपनाउन महाशाखाले आग्रह गरेको छ ।

आज दिउँसो देशभर सामान्य बदली रही धेरैजसो स्थानहरुमा मेघगर्जन र चट्याङसहित हल्का देखि मध्यम वर्षाको संभावना रहेको छ।

प्रदेश १, २, ५ र सुदुरपश्चिम प्रदेशका एक, दुइ स्थानमा भारी वर्षाको संभावना रहेको जल तथा मौसम पूर्वानुमान महाशाखाले जनाएको छ।

त्यसैगरी आज राती देशका सबै प्रदेशहरुमा सामान्य बदली रही धेरैजसो स्थानहरुमा मेघ गर्जन र चट्याङसहित हल्का देखि मध्यम वर्षाको संभावना रहेको महाशाखाले जनाएको छ।

प्रदेश १, प्रदेश २, गण्डकी प्रदेश, प्रदेश ५ र सुदुरपश्चिम प्रदेशका एक, दुई स्थानमा भारी वर्षाको संभावना रहेको जल तथा मौसम पूर्वानुमान महाशाखाले जनाएको छ।